Infurmaziun: Quest podcast da videos vegn stritgà la fin da fanadur 2021. Episodas existentas e futuras chattais vus sin noss portal Play RTR (www.rtr.ch/play). Minisguard è l’emissiun d’infurmaziun per uffants. Ella dat ina survista da quai che succeda en la regiun, en il chantun e sin il mund. Tge capita cun ils peschs sch'il chametg dat en l'aua? Pertge san las flurs cura ch'ellas han da flurir? RTR elavura temas relevants da la politica, da la cultura e dal sport uschia ch’uffants pon chapir quels.
Minisguard dals 21.10.2023
Élin emprenda da Peter da resgiar e fender laina a maun Ils dis d’atun cura ch’i vegn pli fraid èsi er puspè da stgaudar. Bleras e blers en il Grischun fan quai sco Peter Janutin cun ina pigna da laina. El stgauda si’entira chasa cun ina pigna scalegl e fa er sez tut la laina ch’el dovra – e quai a maun. Il selvicultur ha mussà ad Èlin dal Minisguard co ch'ins resgia e fenda laina a maun tar el a chasa a Savognin. Élin visita ina fabrica da laina per stgaudar a Panaduz Peter fa blera laina. Ma i dat da quels e quellas che fan anc bler dapli laina cun grondas maschinas. Uschia ina «fabrica» da laina per stgaudar è a Panaduz. Là produceschan Lukas Lütscher e collegas tut en tut var 15’000 tonnas laina per stgaudar en in onn, quai è tant sco passa 600 camiuns plain laina. Lukas ha mussà ad Èlin tut ils pass dal mument ch’il camiun riva cun ils pigns e plantas or dal guaud fin tar il pachet cun 15 kg u er passa 400 kg laina per stgaudar.