Infurmaziun: Quest podcast da videos vegn stritgà la fin da fanadur 2021. Episodas existentas e futuras chattais vus sin noss portal Play RTR (www.rtr.ch/play). Minisguard è l’emissiun d’infurmaziun per uffants. Ella dat ina survista da quai che succeda en la regiun, en il chantun e sin il mund. Tge capita cun ils peschs sch'il chametg dat en l'aua? Pertge san las flurs cura ch'ellas han da flurir? RTR elavura temas relevants da la politica, da la cultura e dal sport uschia ch’uffants pon chapir quels.
Minisguard dals 11.11.2023
L’iniziativa per la plazza da scola a Trun: Lara Sofia è 9 onns veglia, scolara a Trun ed ha fatg insatge che pacs uffants fan en sia vegliadetgna, ella ha lantschà in’iniziativa! Per ella porscha la plazza da scola a Trun memia pac per ils uffants da scola uschia ch’ella ha rimnà ina massa suttascripziuns per midar quai. Il sistem da scolaziun dual: Sche ti has finalmain terminà la scola èn tes vitg n’èsi tuttina betg finì cun emprender ed ir a scola. Durant tes emprendissadi visitas ti almain in di ad emna la scola professiunala. Quest sistem da lavurar ed ir a scola numnan ins la scolaziun duala.