Il «Profil» è ina baterlada persunala, cundida cun mirveglias, istorgias ed ils giavischs da musica da noss visavi. Uschia porscha l’emissiun sonda per sonda biografias, destins, istorgias ed experientschas dad umens e dunnas, giuven e vegl, da prominents u simplamain da persunas ch’han da dir e da raquintar insatge. Ils ultims 30 onns ha il «Profil» uschia laschà vegnir a pled var 1’500 Rumantschas e Rumantschs, ed anc adina n’èsi nagin problem da preschentar novs giasts interessants.
Vanessa Fay Duque - La passiun per la lavur da model n'era betg adina qua
Actualmain è sia fatscha da vesair sin in placat en in center da cumpra a Londra. Che quai vegniss in di uschè lunsch n'avess Vanessa Fay Duque mai pensà. Tuttina ha sia via manà ella en quella direcziun. Dapi in onn e mez è ella model professiunal – e fa quai cun passiun. Gia da pitschna buoba hajan persunas fatg attent ch'ella avessia potenzial da daventar model. Quai saja restà enfin il di dad oz e perquai haja ella lura insacura era gì interess da star davant la camera. Anc durant ses emprendissadi mercantil en ina garascha d'autos ha Vanessa Fay Duque fatg ses emprim shooting che ha sveglià sia passiun per la lavur da model. Ussa, dus onns pli tard è ella gia stada avant la camera per diversas marcas da resti, davent da resti da sport enfin dessous e resti da bogn, cosmetica ed auters artitgels da reclama. La giuvna sursilvana cun ragischs dal Portugal n'è pia betg in model da «high fashion». Ella na preschenta betg las novas collecziuns da resti sin la passarella, mabain davant la camera. En quella categoria sajan auters attributs impurtants. Numnadamain in bel carisma, ina fatscha simmetrica ed autras atgnadads unicas din model.