Infurmaziun: Quest podcast da videos vegn stritgà la fin da fanadur 2021. Episodas existentas e futuras chattais vus sin noss portal Play RTR (www.rtr.ch/play). Minisguard è l’emissiun d’infurmaziun per uffants. Ella dat ina survista da quai che succeda en la regiun, en il chantun e sin il mund. Tge capita cun ils peschs sch'il chametg dat en l'aua? Pertge san las flurs cura ch'ellas han da flurir? RTR elavura temas relevants da la politica, da la cultura e dal sport uschia ch’uffants pon chapir quels.
Minisguard dals 27.04.2024
Sgrattar e schubregiar il culiez ad ina tartaruga da Galapagos che paisa fin 200 kilos, controllar las nudaglias dals chauns da mar ubain preparar l’eucaliptus per ils coalas. Tut quai èn lavurs che la tgiradra d’animals Kim Manetsch fa dapi passa quatter onns adina puspè. Il Minisguard ha accumpagnà ella durant in di da lavur en il zoo da Turitg. E daco datti atgnamain zoos? Ina giada, avant passa 1’000 onns, eran zoos mo insatge dals imperaturs e dals retgs. Cun ils animals selvadis sco tighers ed elefants mussavan els lur pussanza e bainstanza. La glieud pli paupra dastgava be guardar ils animals d’occurrenzas spezialas. Co ch’i gieva cun ils animals interessava da lez temp anc strusch insatgi. Ils zoos sco che nus enconuschain els oz èn sa sviluppads pir bler pli tard. Il Minisguard declera co tut quai è capità