Cuntrasts discurs è l’emissiun da «talk» da la Televisiun Rumantscha. Il moderatur discurra cun ses giast sur da temas impurtants che sa dattan ord la vita professiunala, ord in engaschament persunal ni ord ina passiun dal protagonist. L’aspectatur emprenda da conuscher il giast d’ina vart surprendenta.
https://www.rtr.ch/play/tv/emissiuns/cuntrasts-discurs?id=c632f1ba-1ef0-0001-93d7-37e2472d1a2f
Cuntrasts discurs dals 18.02.2018
Cuntrasts Discurs ina giada viceversa: Rico Valär è il giast. Avant 80 onns, la saira dals 20 da favrer 1938, avevan las vischnancas rumantschas laschà strasunar ils zains. In di da plaschair per il mund rumantsch, per la lingua rumantscha: Cun 92 pertschient vuschs aveva il suveran svizzer numnadamain approvà quella dumengia da vulair resguardar il rumantsch sco quarta lingua naziunala. Curt avant che la Segunda Guerra mundiala prorumpia en Europa, era quest resultat in impurtant signal da coesiun e defensiun naziunala. Pertge atgnamain? E tge consequenzas ha gì questa decisiun per l’acceptanza e la promoziun dal rumantsch? «Cuntrasts» prenda la chaschun per discutar davart la votaziun istorica d’avant 80 onns. Expert en chaussa è Rico Valär, professer designà da rumantsch a l’Universitad da Turitg e normalmain sez il moderatur dals «Cuntrasts Discurs». Questa giada mida Rico Valär dentant la rolla: El è sez giast da la moderatura Anna Serarda Campell.