Il «Profil» è ina baterlada persunala, cundida cun mirveglias, istorgias ed ils giavischs da musica da noss visavi. Uschia porscha l’emissiun sonda per sonda biografias, destins, istorgias ed experientschas dad umens e dunnas, giuven e vegl, da prominents u simplamain da persunas ch’han da dir e da raquintar insatge. Ils ultims 30 onns ha il «Profil» uschia laschà vegnir a pled var 1’500 Rumantschas e Rumantschs, ed anc adina n’èsi nagin problem da preschentar novs giasts interessants.
Massimo Gurini – «Musica è mia vita»
La vita dal Schlarignot è dominada da suns, tuns, «drums» e bass ch'el maschaida ensemen sco DJ notg per notg. Per Massimo Gurini è gia baud stà cler ch'el vul passentar sia vita faschond musica. Perquai ha el investì ses emprims raps en tecnica ed apparats per maschadar ils tuns e tacts ed ha drizzà en sia stanza sco disco. En congual cun sia lavur d'avant 10 onns, s'han las lezias redubladas. 70% da ses temp investescha el perquai entant en sia passiun, e tar quella tutga er tut la promoziun. Be uschia haja el ina schanza d'avair success, di l'um da 27 onns. La finamira principala dal Schlarignot è oravant tut da fascinar la glieud cun sia musica, sche pussaivel perfin cun quella cumponida sez. Dentant emprova Massimo Gurini er da betg be passentar ses temp en ses studio di e notg, mabain er da sa mover adina puspè en la natira.