Dominik's Audio-Erlebnis

Mini Gedanke derzue wie me Neujohrs-Vorsätz nid gad wieder ufgit..

Wenn me öpis aus vou wichtig empfindet, so wie jz zum Bispiu Seiligumpe, denn isches meischtens öpis wo me über ne sehr langi Zyt geng wieder sött mache. Wöu die wichtigschte Sache im Läbe zahle sech meischtens ersch nach ere sehr lange Zyt us. Derbi muess me se regumässig usüebe, grad ou denn wenns eim chli “aschisst”. Es git immer wieder so a Täg wome eich nid so d Motivation verspürt. Grad denn wärs aber am wichtigschte, dass mes denn äbe gliich macht.

Es git äbe sone Trick, wo eim die Täg erliechteret. E Trick wo macht, dass me a dene Täg wos eim “aschnäggelet” (sis Training, sini Üebige, sini Neujahrs-Vorsätz, sini what-ever) ds mache, dass me denn weniger Motivation u weniger Überwindig brucht die Sache gliich ds mache; und zwar, wenn me ei Monat lang sini wichitgi Beschäftigung vou intensiv Täglech usüebt! Wöu schiins isch es e so, dass d Ableuf vore neue Beschäftigung nach 30 Täg i re angeri Äbeni vo sim Nervesystem, sim Ghirn (oder so) über geit/abgschpicheret wird. U sobaud die Ableuf dert inne gschpicheret si, denn brucht me nur no e Bruchteil (!) vo dere Motivation, Wiuenschraft oder Überwindig wo me eigentlech ursprünglech würd bruche.

Es geit sogar no witer, sobaud die neui Beschäftigung nach dene 30 Täg im ne angere Teil vom Ghirn abgschpicheret isch denn gits sogar no e Art metaphorische Rüggewind. Nämlech bechunt me denn jedes Mou wes wider so wit wär die Beschäftigung ds mache – es Gfieu vo unbehage. So wie eim öpis fäut. Me wird so nervös oder öpis ähnlechs. so a la “mann mir fäut ds Seiligumpe” und me wott zB. go Seiligumpe u es isch gar ke “Aschiss” meh. Ämu das Gfiu chunt ds mingscht, wenn me mehreri Sessions usgloh het.

So wirds vou natürlech, dass me das macht wome weiss me sött mache und d Wahrschiinlechkeit dass mes loht lo schliife wird denn fiu töifer.

Aber es bruucht recht fiu Energie, bis es de “Switch” macht und die neui Beschäftigung zu re Art Gwohnheit wird. Das isch e rechti Hemmschwöue für eim. Aber wenn me während dene 30 Täg sech nid “beugt” denn sött me si neu “Vorsatz” fasch wie zum ne Teil vo sich gmacht. Ja das wäre gloub besseri Wort: “Vorsatz” und “Teil vo sich”.

I chas bis jetzt bestätige, dass das mit de neue Gwohnheite wük so funktioniert. Wöu so hanis bim Chrafttraining im Fitnesszäntrum und bim Meditiere gmacht. Und es het sech genau so agfieut, no bis hüt. Am Afang hets huere Überwindig brucht (ca. für 30 Täg) aber sither, ischs eifach öpis woni fasch “outomatisch” mache oder ds mingscht bruchi nüm so Überwindig das aube ds mache. Jetz überlegi mer was i us nöchschti Gwohnheit cha avisiere. hehe

PS: I weiss nid wie fescht de Verglich passt: Aber chönt chli Ähnlech si, wie bim lehre Outofahre. Am Afang ischs e u huere Sach, u s`chunt eim so vor aus obs vou ds fiu Sache git wome glichzitig muess beachte (Blicke richtig, Schalte, Verchehrsregle, ke Umfauboue) u denkt sech “ou dammn, das wirdi nie chönne”. Aber nachdem me d Prüefig nach (öpe 30 Täg :D ) bestange het, denkt me sech gar nümme derbi. Me nimmt eifach d Outoschlüssle, stigt is Outo u fahrt los. Fertig. Het irgendwie e gwüssi Ähnlechkeit zu mim Tipp für Neujohrs-Vorsätz. hehe. Wöu steu der mou vor, me hätt ir Heufti vo de Fahrlektione für d Outoprüefig eifach ufghört u ufgä. Denn chönnt me hüt jetz nid eifach Schlüssu nä, istige u losfahre. :) hehe ähnlech bi neune Gwohnheite u Vorsätz.

Aber wie geng. Ob das wük stimmt, muess me am beste eifach säuber usprobiere. Nur denn het wük Gwüssheit über so Spekulatione. U das hani o vor.

peace