Anne Colonia - Jeck op Kölle - Köln verliebt ????

Leev Lückcher, hück hab ich e Kölsch Rümche för üch. Domet ehr et Noblesse künnt, seht et he: Uns kölsche Tön. M'r höht - un dat es janit schön - en Kölle kaum noch kölsche Tön. Kaum einer kann bei uns en Kölle, noch wie de Jroß et kunnt, verzälle. Fröher dät m'r, dat wor klor, schwade wie de Schnüss jewahse wor. Üvverall hoht m'r nor kölsche Tön, unverfälsch un wunderschön. Och de Pänz däten et jän hüre un kei Minsch dät sich draan stüre. Selvs de Lehrer sproche Kölsch, wä kennt en nit, dä Lehrer Welsch? Hückzedaach es dat vörbei, jeschwad Weed hück esu allerlei. Mer höht Grieche, Italiener, Türke, Chinese, als wör et niemols anders jewäse. Huhdütsch liert m'r en d'r Schull, nit wie domols dreimol Null. Uns Muttersproch weed ov verhöhnt, hückzedaach es Kölsch verpönt. All die, die hück noch Kölsch dunn schwade, sin vör de miehste Lück bloß Kraade. Doch frög m'r ens einer: "Wat es dann en Kraat?", weed bloß e domm Jeseech jemaht. "En Kraat?", höht m'r dann, "den Ausdruck kenne ich nicht. Ist das ein neues Pizzagericht?" Plüschprumm, Öllig, Vujel, Kabass? "Kenne ich nicht, was heißt denn das?" Wä kennt noch die Leeder vum Ostermanns Will, versteiht em Hännesche dat Spill? Wä jitt singem Weech, dann hück noch e Bützje, unger'm Dreikünnigepöötzche? Nor einmol em Johr, ejal en wat för ener Sproch se verzälle, stonn se am Rusemondaachszoch un schreie: "Kamelle!" Uns Zick es hektisch, de Jemötlichkeit fitü, esu schön wie et fröher wor, weed et nit mieh. Un ben ich ens woanders, ejal wie et kütt, e Stöckche vun Kölle nemme ich met. E Bildche vum Dom, för et Hätz e kölsch Leed, dann weiß ich, dat mer nix passeet. Et soll jeder levve noh singer Fazzung, ich dät zo Foß noh Kölle jon. Maht et jod, üre Anne Colonia ????????‍♀️????❤️